Хөгжлийн бэрхшээлтэй хүүхдийн эрт илрүүлэг, үзлэг оношилгоо зөвлөгөө VII дугаар цэцэрлэг дээр болж байна

Орхон аймгийн Засаг даргын Тамгын газраас “Жендерт суурилсан хүний эрхийг хүндэтгэе” аяныг дөрвөн сарын хугацаанд зохион байгуулахаар өнгөрсөн гуравдугаар сараас эхлүүлсэн. Гуравдугаар сарын турш “Эмэгтэйчүүдийн хөгжил, оролцоо” сэдвийн хүрээнд нөлөөллийн ажил зохион байгуулсан бол энэ сарыг "Хөгжлийн бэрхшээлтэй иргэдийн хөгжил оролцоо"-ны сар болгон зарласан. 

    Үүний хүрээнд өнөөдөр  ЗДТГ-аас  Хөгжлийн бэрхшээлтэй хүүхдүүдийн  сэргээн засах хөгжлийн төвтэй хамтран “Хүүхдийн эрт илрүүлэг, үзлэг оношилгоо зөвлөгөө, мэдээлэл сургалт арга хэмжээ”-г VII дугаар цэцэрлэг дээр эхлүүллээ. Тус арга хэмжээ  15,16-ны өдрүүдэд хоёр өдрийн турш үргэлжилнэ. 

    Бага насны хүүхдийн хөгжлийн бэрхшээл, хоцрогдлыг үнэлэх, эрт илрүүлэх 18 ба 36 сартай хүүхдийн эрүүл мэнд, хөгжлийн цогц үзлэг хийж, бага насны хүүхдэд хөгжлийн үнэлгээ, үзлэг хийх, хөгжлийн бэрхшээлтэй хүүхэдтэй ажиллах арга зүйн зөвлөгөө мэдээллийг эцэг эхчүүдэд болон хөгжлийн бэрхшээлтэй хүүхэдтэй ажилладаг төвийн багш, арга зүйч, цэцэрлэгийн багт нар олгох нь тус арга хэмжээний зорилго юм. 

    Орхон аймагт 4216 хөгжлийн бэрхшээлтэй иргэд байдгийн 0-16 нансны 390 хүүхэд байна.  Эдгээрээс тулах эрхтний  бэрхшээлтэй хүүхэд илүү  давамгайлж байгаа аж.  Орхон аймагт төдийгүй улсын хэмжээнд  тулгамдаж байгаа нэг асуудал хөгжлийн бэрхшээлтэй хүүхэдтэй ажиллах сэргээн засах эмч болон хөдөлгөөн засалч, мэргэжлийн эмчийн боловсон хүчин юм.

   ЗДТГ-ын Хөгжлийн бэрхшээлтэй хүүхдийн асуудал хариуцсан мэргэжилтэн Г.Эрдэнэбулган боловсон хүчний бодлогыг улсын хэмжээнд  авч үзэж байна.  Одоо байгаа боловсон хүчнүүдээ аль болох бусад аймаг орон нутагт  илгээж харилцан  туршлага судлуулах,  сургалт  арга зүйг олгох чиглэлд анхаарч  байгаа талаар хэлсэн.  

Хөгжлийн бэрхшээлтэй хүүхдийн сэргээн засах хөгжлийн төвийн Арга зүйч Б.Хулан “Ойрын хэдэн жил төрөөс хөгжлийн хөгжлийн бэрхшээлтэй ажиллах мэргэжилтэнгүүдийг бэлтгээгүй учраас боловсон хүчний нөөц хомсдолтой байгаа нь үнэн. МУБИС дээр тусгай хэрэгцээт боловсролын багш, АШУС дээр хөдөлгөөн засалч гэх мэт мэргэжлийн боловсон хүчинг бэлдэж эхэлсэн” гэлээ. 

   Хөдөлмөр нийгмийн хамгааллын яамнаас “Халамжаас хөдөлмөрт” бодлогыг баталсан. Үүний хүрээнд тухайн хүүхдийг аль болох эрт илрүүлж, бага насанд нь хөгжлийн дэмжлэг үзүүлснээр  ирээдүйд халамж хүртэх биш татвар төлөгч болохын үндэс суурь нь  эрт илрүүлэгтэй салшгүй холбоотой гэж зохион байгуулагчид хэлсэн.