“Хоршооллыг дэмжих жил-2022” хоршоологчдын зөвлөгөөнөөс гаргасан зөвлөмж

Засгийн газраас 2022 оныг “Хоршоог дэмжих жил” болгон зарласантай холбогдуулан Орхон аймгийн Жаргалант суманд өнөөдөр “Хоршоог дэмжих-2022” аяны нээлт болж, хоршоологчид зөвлөгөөнөө хийлээ.  2021 онд УИХ-аас Хоршооны тухай хуулийн шинэчилсэн найруулгыг баталсан. Мөн Монгол Улсад хоршоолох хөдөлгөөн үүссэний 100 жилийн ой тохиож буйтай холбогдуулан 2022 оныг  “Хоршооллыг дэмжих жил” болгон зарласан.

   2021 оны байдлаар Орхон аймгийн хэмжээнд 70 хоршоо улсын бүртгэлд бүртгэлтэй байгаагаас Баян-Өндөр суманд 56, Жаргалант суманд 14 хоршоо байна. Эдгээрээс 23 нь идэвхтэй үйл ажиллагаа явуулж байна.

Зөвлөгөөнд Засаг даргын орлогч А.Түвшинжаргал, М.Түмэнжаргал, Хүнс хөдөө аж ахуйн газрын дарга Ж.Бат-Өлзий, Баян-Өндөр сумын Засаг дарга, Б.Баасансүрэн, Жаргалант сумын Засаг дарга Б.Зоригтаатар, Монголын хоршооллын үндэсний нэгдсэн холбоо, Орхон аймгийн Хөдөө аж ахуйн хоршоологчдын холбооны тэргүүн М.Чулуунзагд болон бусад албаныхан,  хоршоологчид оролцож дараах зөвлөмжийг гаргасныг бүрэн эхээр нь хүргэе.

• Монгол Улсын Их хурал, Засгийн газраас 2022 оныг “Хоршооны хөгжлийг дэмжих жил” болгосонтой холбогдуулан хоршооллын хөдөлгөөнийг эрчимжүүлэх үйл ажиллагааны бодит төлөвлөгөө гарган ажиллах,
• Хоршооны гишүүд, иргэдэд хуулийн зүйл, заалт, үзэл баримтлалыг тайлбарлан таниулах, сурталчлах, хоршоодод чиглэсэн сургалт, зөвлөгөө, семинар зохион байгуулах,
• Хоршоод өөрсдийн дүрэм, дотоод журам, үйл ажиллагааг хуульд нийцүүлэн өөрчлөх, болзошгүй эрсдэлээс хамгаалах сан, хоршооны хөгжлийн сан, ногдох орлого хуваарилах, гишүүдийн идэвх оролцоог үнэлэх зэрэг журмыг шинэчлэх, шинээр батлан мөрдүүлэх, хоршоод баримт бичиг, үйл ажиллагаагаа баталгаажуулсны үндсэн дээр шинэчлэн бүртгүүлэх,
• Орон нутгийн хоршоологчдын гаргаж буй санал, санаачилгад тулгуурлан загвар хоршоо бий болгох ажлыг зохион байгуулах, бусад шилдэг, тэргүүний хоршоодыг түшиглэн туршлага солилцох аялал, үзүүлэх сургалт зохион байгуулах,
• Аймгийн төвшинд жил бүр тэргүүний болон шилдэг хоршоо шалгаруулах, сурталчлах
• Хоршоог хөгжүүлэх сангаас зээл, дэмжлэг авах замаар санхүүгийн болон тоног төхөөрөмж, техник хэрэгслийн хангамжийн асуудлаа цэгцлэхэд хоршоод өөрсдөө санаачилга гарган идэвхтэй ажиллах,
• Төрийн худалдан авалтад хоршоодын оролцоог хангах, төрийн зарим чиг үүргийг хоршооллын байгууллагаар гүйцэтгүүлэх бодлогыг хэрэгжүүлэхэд идэвх санаачилга гарган ажиллах,
• Гишүүдийн оролцоог бодитой үнэлэх, хоршоондоо ажилласан, хандсан байдал, идэвх оролцоог харгалзан жил бүр  шагнал урамшуулал олгох, шагналд тодорхойлох, ногдох орлого хуваарилах асуудлыг хэвшил болгон төлөвшүүлэх хэрэгтэй байна. Мөн хөгжлийн цэгцтэй бодлого, төлөвлөгөөтэй ажиллаж үр дүнг дүгнэж тооцдог байх, дотоод хяналтыг сайжруулах зэргээр шинэ сэтгэлгээ, арга барилаар ажиллах
• Хоршооны гишүүн бүр өөрийгөө бүрэн хэмжээгээр хөгжүүлж, хоршооны хөгжилд түлхэц болох,
• хоршоог хөгжүүлэх, өргөтгөх, төрийн болон хувийн байгууллагуудаас хараат бус бие даасан байдлыг нь хангах
• Хоршооны удирдлагын ардчилсан сонгуулиар сонгох,
• Ногдол орлого хуваарилалт, хоршооны бусад үйлчилгээг хүртэхэд гишүүд шударгаар оролцох
• Үйл ажиллагаа болон шийдвэр гаргалтад гишүүд адил эрхтэй байх
• Гишүүдтэй болон зах зээлийн харилцаанд орохдоо үнэнч байх.
• Хоршоодын үйл ажиллагааны хамгийн чухал үнэт чанар бол хамтын хүч, эв нэгдлийн цогц хандлага юм.
• Хоршооны хөгжлийн асуудлыг дан ганц гишүүддээ мэдээлж байхаас гадна олон нийтэд нээлттэй байх.
• Гишүүдээр зогсохгүй хоршоо оршин байгаа нийгмийн сайн сайхны төлөө санаа тавих.
• Хоршоо оршин байгаа нийгмийн хөгжилд санхүүгийн болон хүмүүнлэгийн хувь нэмэр оруулах

Мэдээллийн төв