Өргөн хэрэглээний бараа бүтээгдэхүүний үнэ зохиомлоор нэмэгдэж байгаа эсэхэд хяналт,шалгалт хийхийг үүрэг болгов

Аймгийн Засаг даргын шуурхай хуралдаан боллоо. Шуурхайн хуралдааныг Засаг даргын орлогч А.Түвшинжаргал, М.Түмэнжаргал нар удирдан явуулав. Шуурхай хуралдаанаар Засаг даргын орлогч М.Түмэнжаргал хэд хэдэн үүрэг даалгавар өглөө.

  Бүх нийтийн их цэвэрлэгээг өнгөрсөн долоо хоногт зохион байгуулахаар төлөвлөсөн  байсан ч энэ долоо хоногийн амралтын өдрүүдэд хийхээр хойшлуулсан. Уг ажлын хүрээнд Баян-Өндөр сумын Засаг дарга Б.Баасансүрэнд хог ачих, татах техникийн судалгаа гаргаж өгөхийг үүрэг болгов.  Засаг даргын орлогч М.Түмэнжаргал “Цэвэрлэсэн хогоо ачих техникээ бэлдээгүй байж хог цэвэрлээд ямар ч нэмэргүй. Цэвэрлэсэн хог нь эргээд хог болно.  Зохион байгуулалтыг сайн хангаж, цэвэрлэгээг далайцтай хийх ёстой” гэлээ. 

   Мөн барилгын ажил эхэлсэнтэй  холбоотойгоор МХГ, ОБГ зэрэг холбогдох байгууллагуудаас ажлын хэсэг гарч хяналт шалгалт хийхийг үүрэг болголоо.

Өнгөрсөн жил инженерийн шугам сүлжээг солих, засах ажил гүйцэтгэсэнтэй холбоотойгоор зарим хэсгүүдийн ногоон байгууламжийг авсан. Тухайн хэсгүүдэд ажил гүйцэтгэсэн компани нөхөн сэргээлт хийх бөгөөд үүнд  Хотын захирагчийн ажлын албыг  хяналт тавихыг үүрэгдлээ.

   Өнгөрсөн баасан гаригт Улаанбаатар хотод жагсаал цуглаан зохион байгуулсантай холбоотойгоор аймгуудад ч мөн  цуглаан болсон. Орхон аймагт цугласан иргэдийн олонх  өргөн хэрэглээний бараа бүтээгдэхүүний үнийн өсөлтөд хяналт тавихыг шаардсан билээ. Уг асуудалтай холбоотойгоор Засаг даргын орлогч М.Түмэнжаргал “Аймгийн Статистикийн хэлтэс долоо хоног бүр бидэнд үнийн мэдээлэл өгдөг. Үүнийг хариуцсан газар  хэлтэс нь дахин сайн нягтлах шаардлагатай байна. ШӨХТГ-ын байцаагч нар, холбогдох газар хэлтсийн мэргэжилтнүүд хамтран зохиомол үнийн хөөрөгдөл байна уу аль эсвэл зах зээлийнхээ эрэлт нийлүүлэлтээр үнэ өссөн байна уу гэдэгт хяналт шалгалт хийгээд  үнэн бодит мэдээллийг иргэдэд өгөх шаардлагатай байна.  Өргөн хэрэглээний бараа бүтээгдэхүүний үнийн өсөлтөд шатахуун, хил гаальтай холбоотой ачаа тээвэр нөлөөлж байгааг хаа хаанаа мэдэж байгаа.  Шатахуун өнгөрсөн оны мөн үеийнхээс 1000 төгрөгөөр буюу 60 гаруй хувиар нэмэгдсэн байна. Монгол Улс 100 хувь ОХУ-аас шатахууны хамааралтай. Орхон аймгийн ЗДТГ-ын удирдлагууд шатахууны үнийг зохицуулж чадахгүй. Шатахууны үнийг дагаад гурил, будааны үнэ нэмэгддэг.  Бид чадахгүй юм аа чадахгүй гээд үнэнээр нь хэлэх ёстой. 

 Орхон аймаг махны үнийг барих гэж өнгөрсөн жил орон нутгийн төсөвт 600 сая төгрөгийг суулгаснаас 300 саяыг нь гарган нөөцийн махыг худалдаалж эхэлсэн. Үхрийн махны үнэ лангуун дээр 13-15 мянган төгрөгийн үнэтэй бол нөөцийн мах 7800 төгрөгийн үнэтэй байна. 150 тонн нөөцийн мах зарагдахаас өнөөдрийн байдлаар  20 гаруй тонн нь нөөцийн мах   30 гаруй цэгээр худалдаалагдаж байна” гэлээ.

    Өнгөрсөн долоо хоногийн шуурхай хуралдаанаар Засаг даргын  өгсөн үүрэг  даалгаврын биелэлтийг аймгийн Тамгын газрын ХШҮДАХ-ийн дарга М.Жанболат танилцуулав. Тухайлбал, Хөдөлмөрийн аюулгүй байдал сарын аяны хүрээнд байгууллага тус бүр төлөвлөгөө гаргахыг үүрэг болгосон. Үүний хүрээнд  ХНХЯ-аас ирүүлсэн чиглэлийн дагуу аймгийн ХАБЭАЗЗ-өөс ажлын төлөвлөгөө гаргаж, төлөвлөгөөний дагуу Хөдөлмөр аюулгүй байдал эрүүл ахуйн сарын аяны нээлтийг аймгийн ҮЭХ-ны байранд хийж 40 гаруй аж ахуй нэгж байгууллагуудын Хөдөлмөр аюулгүй байдлын зөвлөлийн дарга, төлөөллийг  хамруулж нийгмийн түншлэлийн 3 талын мэдээллийг өгч, шууд лайваар мэдээллийг  олон нийтэд хүргэжээ. Мөн байгууллагуудад хугацаатай үүрэг чиглэл албан тоотоор хүргүүлсэн байна. Сарын аяны хүрээнд ЗДТГ, ХХҮГ, ХББЗА, БОАЖГ, ГБХЗХГ, НДХ, ОБГ, ОНӨГ, СХДАА, ХХААГ, “Эрдэнэт ус, дулаан түгээх сүлжээ”ОНӨХК зэрэг байгууллагууд нийт 100 гаруй арга хэмжээг хэрэгжүүлэхээр төлөвлөгөө гарган ажиллаж байна.

    Засаг дарга С.Батжаргал  Эрдэнэт хотын хэмжээнд  зохион байгуулагдаж буй хурал зөвлөгөөн, арга хэмжээнээс гарсан санал санаачлагад тулгуурлан ажлын төлөвлөгөө гаргаж ажиллахыг үүрэг болгосон. Үүний хүрээнд “Ногоон Эрдэнэт”, “Эрдэнэт 2022” IT, бизнес инновацийн зөвлөлийн хүрээнд санамж бичиг байгуулсан МУИС, ХААИС, Шинжлэх ухааны академи, Шинжлэх ухааны сантай хамтран ажиллах ажлын төлөвлөгөө гарган санал авахаар хүргүүлжээ.

    Түүнчлэн энэ сарын 1-нд зохион байгуулсан “Дахин төлөвлөн барилгажуулах, дэд бүтэцжүүлэх” улсын анхдугаар зөвлөгөөнөөс гарсан санал, зөвлөмж нийслэлийн ЗДТГ, НОСК, “Амины орон сууц инноваци хөгжлийн төв” ТББ-тай байгуулсан санамж бичгийн хүрээнд хэрэгжүүлэх ажлын төлөвлөгөөг боловсруулж байна.