Статистикийн хэлтсээс нийгэм, эдийн засгийн хөгжлийн энэ оны эхний гурван сарын дүнг танилцууллаа

Аймгийн нийгэм, эдийн засгийн хөгжлийн энэ оны эхний гурван сарын дүнг танилцуулж Статистикийн хэлтэс хэвлэлийн хурал хийлээ. 

    Аймгийн төсөвт 34.3 тэрбум төгрөгийн орлогыг төвлөрүүлж, төсвийн гүйцэтгэл 79.9 хувьтай байна. Татварын орлогын төлөвлөгөө 23.6 хувиар тасарч, татварын бус орлогын төлөвлөгөө 57.5 хувиар даван биелжээ. Өмнөх оны мөн үеэс орлого 0.4 хувиар их, нийт зарлага санхүүжилт 46.2 хувиар буурсан үзүүлэлттэй байна. Орон нутгийн төсвөөс төлөвлөгөөт санхүүжилтийн 18.4 хувь буюу 9.8 тэрбум төгрөгийн зарлага санхүүжилт хийсний 4.0 хувийг нийгмийн даатгалын шимтгэлд, 9.8 хувийг хөрөнгийн зардалд, 12.5 хувийг татаас ба урсгал шилжүүлэгт, 31.9 хувийг цалин хөлсөнд, 41.8 хувийн бараа үйлчилгээний зардалд зарцуулжээ. 

       Тайлант хугацаанд гадаад худалдааны эргэлт 953.9 тэрбум төгрөгт хүрсний 89.1 хувийг экспорт, 10.9 хувийг импорт эзэлж байна. Оны эхний гурван сарын байдлаар 148.3 тонн зэсийн баяжмал, 1.1 мянган тонн молибдены баяжмал, 0.8 мянган тонн катодын зэс зэрэг 850.1 тэрбум төгрөгийн бараа бүтээгдэхүүн экспортолж, хүхрийн хүчил 1.8 мянган тонн тээрмийн ган бөмбөлөг 4.6 мянган тонн,  дизелийн түлш 8.6 мянган тонн, бензин 8.7  мяняган тонн зэрэг нийт дүнгээр 103.8 тэрбум төгрөгийн бараа бүтээгдэхүүн импортоор авчээ. 

   Статистикийн хэлтсээс долоо хоног бүр тогтсон нэг цэгээс бараа бүтээгдэхүүний үнийн судалгааг хийдэг. Тухайн бүтээгдэхүүний үнийн өсөлт  бууралт бодитой юу үгүй юу гэдгийг үнэн зөвөөр гаргаж ирэхийн тулд тогтсон нэг цэгээс судалгааг авдаг. Долоо хоног бүр өөр, өөр цэгээс үнийн судалгаа авбал тухайн бараа бүтээгдэхүүнийн үнийн өсөлт бууралт үнэн зөв гарахгүй. Манай хэлтсийн үнэ хариуцсан мэргэжилтэн долоо хоног бүр тогтсон цэг дээрээс бараа бүтээгдэхүүний үнийн мэдээллийг судалдаг учраас манай үнийн мэдээлэл бодитой гардаг гэх мэдээллийг Статистикийн хэлтсийн ахлах мэргэжилтэн М.Пүрэвмаа өглөө. 

    Мөн тэрээр,  "Хамгийн сүүлийн буюу энэ сарын 6-ны өдрийн мэдээллийг бид авсан. Энэ лхагва гаригт дахин үнийн мэдээллээ цуглуулна. Дөрөвдүгээр сарын 6-нд авсан үнийн мэдээллийг өмнөх долоо хоногтой харьцуулахад хонины мах 2.8 хувь, үхрийн мах 2.4 хувийн өсөлттэй гарсан бол ямааны мах, гурил, элсэн чихэр, цагаан будаа  сүү,А80, 92 дизель түлшид үнийн өөрчлөлт ороогүй байна. 

Дөрөвдүгээр сарын 6-ны үнийн мэдээллийг өмнөх оны мөн үетэй харьцуулахад өргөн хэрэглээний бараа бүтээгдэхүүн дээр үнийн өөрчлөлт ороогүй ганц бүтээгдэхүүн нь сүү, ямааны мах  байгаа аж.  Хонины мах 5.8, үхрийн мах 13.4, нэгдүгээр гурил 2.4 хувь, элсэн чихэр 18.7, цагаан будаа 17.3, А-80, 68.8 хувиар тус тус өссөн үзүүлэлттэй байна" гэлээ.