“ЭРДЭНЭТ ХӨГЖИЛ- 2021” ЭДИЙН ЗАСГИЙН ФОРУМ БОЛНО

Орхон аймгийн эдийн засгийн өнөөгийн нөхцөл байдал, тулгамдсан асуудал, шийдлийг төр засаг, хувийн хэвшил, иргэний нийгэм, эрдэмтэн судлаачид хамтран хэлэлцэх боломжийг бүрдүүлэх зорилгоор “Эрдэнэт хөгжил- 2021” эдийн засгийн форум 10 сарын 19, 20-нд зохион байгуулагдах гэж байна. 

     Хөрөнгө оруулалт, технологи, түншлэл уриан дор зохион байгуулагдах уг чуулганы ерөнхий зохион байгуулагчаар аймгийн Засаг даргын тамгын газар, хамтран зохион байгуулагчаар ЗГ-ын тохируулагч агентлаг, Үндэсний хөгжлийн газар,  "Эрдэнэт үйлдвэр" ТӨҮГ,  Худалдаа аж үйлдвэрийн танхимын Орхон аймаг дахь салбар, "Эрдэнэт шинжлэх ухаан, технологийн парк" ОНӨҮГ оролцож байгаа юм. 

      Түүнчлэн энэ жил цар тахлын нөхцөл байдлаас шалтгаалан танхимын болон цахим хосолсон хэлбэрээр явагдана. Чуулганд: Хот байгуулалт, түншлэл, хөгжлийн төлөв, Бизнес ба мэдээллийн технологи, Орхон аймагт шаардлагатай байгаа 45 мэргэжилтэн, Гарааны бизнес, хөрөнгө оруулалт, шилдэг бизнес эрхлэгчдийн туршлага, Судалгаа, инноваци, технологи дамжуулалт, Орхон аймгийн эдийн засгийн өнөөгийн нөхцөл байдал, хөгжлийн гарц, шийдэл гэсэн үндсэн зургаан сэдвээр хэлэлцүүлэг өрнүүлэхээр урьдчилсан төлөвлөгөө гаргаад байна. 

      Дээрх хэлэлцүүлгүүдэд Орхон аймагт хэрэгжиж буй технологид суурилсан эдийн засгийн хурдасгуур  төсөл хөтөлбөрүүд болох “Цахим Эрдэнэт-1 ба хот байгуулалттай холбоотой онцлох төслүүд”, ногоон хөгжилд чиглэсэн онцлог төслүүдийг танилцуулагдах бөгөөд хувийн хэвшлийн байгууллагын бизнесийн амжилт ололтуудыг сонсох боломжтой. 

     Тус чуулга уулзалтын үр дүнд Орхон аймгийн эдийн засгийн хөгжлийн гарц, шийдлүүд бий болох, төслийн хөрөнгө оруулалт шийдвэрлэгдэх, олон талт түншлэл, харилцаа, холбоо сайжрах зэрэг ач холбогдолтой юм. 

    Форумын үйл ажиллагаанд иргэд аж ахуйн нэгжүүд чөлөөтэй оролцох боломжтой бөгөөд бүртгэлийг https://erdenetforum.mn/ сайтаар дамжуулан хийж байна.