Орхон аймаг: 2021-2022 оны хичээлийн жилд ЕБС-д 24565 хүүхэд суралцана

Боловсрол соёл урлагийн газрын дарга О.Ариунгэрэлт боловсролын салбарын цаг үеийн онцлох мэдээллийг танилцууллаа. 

      2022 онд аймгийн хэмжээнд 25 ерөнхий боловсролын сургууль хичээллэнэ. Үүнд төрийн өмчийн 16 сургууль, шинээр байгуулагдаж байгаа нэг сургууль, Насан туршийн албан бус боловсролын нэг төв, төрийн бус өмчийн долоон сургууль байгаа юм. 

   Ерөнхий боловсролын төрийн өмчийн сургуульд 22481 хүүхэд, 1588 багш ажилтан, төрийн бус өмчийн сургуульд 2084 хүүхэд нийт 24565 хүүхэд суралцана гэсэн санал ирүүлээд байна. Суралцаж байгаа хүүхдүүдээс 2 дотуур байранд 135 хүүхэд амьдрахаар төлөвлөж байна. 

    Аймгийн хэмжээнд 2022 онд 38 цэцэрлэг хичээллэхээс төрийн өмчийн 29 цэцэрлэг, шинээр байгуулагдаж байгаа 1 цэцэрлэг \Яргуйт баг\, төрийн бус өмчийн 8 цэцэрлэгүүд тус тус сургалтын хэвийн үйл ажиллагааг хангаж ажиллана. Төрийн өмчийн цэцэрлэгт 1174 багш ажилтан ажиллана. 

    2021 онд боловсролын салбарт улсын төсвийн хөрөнгө оруулалтаар 4 ажил, орон нутгийн хөрөнгө оруулалтаар 14 ажил төлөвлөгдсөн. Улсын төсвийн хөрөнгө оруулалтаар Яргуйт багт 150 хүүхдийг цэцэрлэгийн барилгын ажил, ЕБС-ийн 1 дүгээр сургуулийн өргөтгөлийн барилга, Говил багийн 250 хүүхдийн суудалтай сургуулийн барилга, Баянбулаг багийн 27-р цэцэрлэгийн гадна талбайн тохижилтын ажил тус тус хийгдэж байна. Харин орон нутгийн хөрөнгө оруулалтаар сургууль цэцэрлэгийн тоног төхөөрөмж, тохижилт, засварын ажлууд хийгдэж байна. Үүнд орон нутаг 1,2 тэрбум гаруй төгрөгийг төсөвлөсөн.