ХОТЫН ӨВӨЛЖИЛТИЙН БЭЛТГЭЛ АЖЛЫН УРЬДЧИЛСАН БИЕЛЭЛТИЙГ ТАНИЛЦУУЛЛАА

Засаг даргын зөвлөлийн 2021 оны 15-р хурал хуралдаж  хотын өвөлжилтийн бэлтгэл ажлын талаар холбогдох байгууллагууд урьдчилсан биелэлтийг танилцууллаа.

     “Эрдэнэт Ус дулаан түгээх сүлжээ” ОНӨХК-ийн хувьд цахилгаан, дулаан, усан хангамж болон ариутгах татуургын чиглэлээр нийт 50 ажлыг төлөвлөж 69,6 хувийн гүйцэтгэлтэй байгаа талаар мэдээллээ.

     “Эрдэнэт Булганы Цахилгаан Түгээх Сүлжээ” ТӨХК-ийн Орхон аймагт хийгдэх их засвар, техник зохион байгуулалтын арга хэмжээ, хөрөнгө оруулалтын ажлын гүйцэтгэл 46,7 хувьтай байна. Харин “Эрчим хүчний төсөл 2”-ын ажлын явцын хувьд аймгийн төвийн 6-0,4кВ-ын цахилгаан түгээх сүлжээг шинэчлэх сайжруулах ажлын явц 23,8 хувийн гүйцэтгэлтэй, хуучин орон сууцны цахилгаан хангамжийг сайжруулах ажлын явц 2,6 хувийн гүйцэтгэлтэй явагдаж байна. Мөн  ухаалаг тоолуур суурилуулах ажлын хүрээнд 1200 ширхэг ухаалаг тоолуурыг баталгаажуулалт хийгдэн суурилуулахад бэлэн болгосон байна.

     “ЭДЦС” ТӨХК нь өнөөдрийн байдлаар 2 зуух, 1 турбинтэй цахилгаан эрчим хүчний ачаалал тогтмол үргэлжилж байгаа талаар мэдээлэл хийлээ. 2021-2022 оны өвөлжилтийн бэлтгэл ажлыг хангах төлөвлөгөө 71,5 хувьтай хэрэгжиж байна. Өнөөдрийн байдлаар 29,202 тонн буюу 50 хоногийн нүүрс нөөцлөлттэй байгаа бөгөөд татан авалт явагдаж байна. Мөн “СС-35/50 МВт-ын турбогенератороор өргөтгөх” төслийн ажил дуусах шатандаа орж цехүүдийн туршилтын ажил хийгдэж байгаа гэлээ.

       Хот тохижуулах газар нь авто замын халтиргаа гулгаанаас урьдчилан сэргийлэх зорилгоор хайрга, давс, бодис нөөцлөх зэрэг өвөлжилтийн бэлтгэл ажлыг ханган ажиллаж байна. Хотын иргэд ААНБ-ын ахуйн болон үйлдвэрлэлийн хог хаягдлыг хог хаягдал тээвэрлэх зориулалтын 19 автомашин, 3 механизмтайгаар ажиллаж жилд дунджаар 130,000-140,000 м3 хог хаягдал ачиж тээвэрлэдэг байна.

Мэдээллийн төв