Танилц: ​Монголд тархаад буй дельта хувилбарын талаар мэдэх ёстой чухал баримтууд...

 

Эрүүл мэндийн сайд С.Энхболд мягмар гаригт Монгол Улсад “SARS-CoV-2” вирусийн дельта хувилбараар өвчилсөн гурван тохиолдол дотоодод бүртгэгдсэн талаар мэдээлсэн.

Энэтхэг улсад өнгөрөгч тавдугаар сард анх бүртгэгдсэн уг вариант нь өнөөдрийн байдлаар дэлхийн 114 оронд бүртгэгдээд байна. ДЭМБ-ын тэргүүн, доктор Тедрос Гебрейесус өнгөрсөн долоо хоногт дельта хувилбар буюу коронавирусийн “B.1.617” вариант нь дэлхийн хэмжээнд “COVID-19” цар тахлын гурав дахь давлагааг эхлүүлээд байгааг мэдэгдсэн. Мөн тэрээр энэхүү вариант нь ойрын хугацаанд дэлхий дахинд хамгийн түгээмэл тархсан доминант хувилбар болох хандлагатай байна гэж анхааруулсан юм.

Тиймээс "SARS-CoV-2” вирусийн дельта хувилбарын тархалт, эмнэлзүйн шинж тэмдэг болон вакцины үйлчлэлийн талаар хийгдсэн сүүлийн үеийн судалгааны материалуудыг эмхэтгэн хүргэж байна.

Дельта вариант “SARS-CoV-2” вирусийн анхны хувилбараас 225 хувь, альфа хувилбараас 50 хувиар илүү халдварлуулах чадвартай

ДЭМБ өнгөрөгч тавдугаар сард Их Британийн “B.1.1.7”, Өмнөд Африкийн “B.1.351”, Бразилын “P1” болон Энэтхэгийн “B.1.617” гэх “SARS-CoV-2” вирусийн дөрвөн өөр вариантыг зайлшгүй анхаарах вирусийн хувилбаруудын жагсаалтад бүртгэсэн. Улмаар анх илэрсэн хугацаагаар нь Грек цагаан толгойн дарааллын дагуу Альфа, Бета, Гамма, Дельта гэж нэрлэсэн.

-АНУ-ын Йелийн их сургуулийн Анагаахын сургуулийн эрдэмтэд Их Британийн альфа хувилбар нь БНХАУ-ын Уханьд бүртгэгдсэн анхны хувилбараас 50 хувь илүү халдварлуулах чадвартай гэх судалгааг хийсэн. Тэгвэл өнөөдөр дэлхий нийтийг айдаст автуулаад байгаа дельта хувилбар нь альфа вариантаас 50 хувь, Уханий хувилбараас 225 хувь илүү халдварлуулах чадвартай гэж үзэж байна.

-БНХАУ-д хийгдсэн судалгаагаар дельта вариантын халдвараар өвчилсөн өвчтөнүүдийн амьсгалын замд Уханий анхны хувилбартай харьцуулахад дунджаар 1000 дахин олон тооны вирус илэрсэн аж. Өөрөөр хэлбэл, эрүүл хүн дельта хувилбараар халдварласан хүнтэй хавьтал болж, агаар дуслын замаар вирусийг залгисан тохиолдолд вирус тухайн хүний биед хурдан нэвтэрч, өвчлөх эрсдэл нь илүү өндөр гэсэн үг юм.

-Мөн БНХАУ-д хийгдсэн судалгаагаар дельта вирусийн халдвар авсан хүнд дунджаар дөрвөн өдрийн дараа шинж тэмдэг илэрч байгаа бол Уханий хувилбар зургаан хоног болдог гэх дүгнэлтийг хийсэн байна.

Дельта хувилбарыг ялгах онцлог шинж тэмдгүүд

Дельта хувилбараар халдварласан өвчтөнүүдэд ханиалгах, толгой өвдөх, хоолой хөндүүрлэх, халуурах болон “COVID-19”-ийн бусад үндсэн шинж тэмдгүүд илэрдэг.

Гэвч Их Британийн Эзэн хааны коллежийн “COVID-19”-ийн Шинж тэмдгийг судлах хүрээлэнгийн мэргэжилтнүүдийн хийсэн судалгаагаар дельта хувилбараар өвчилсөн хүмүүст ханиалгах болон үнэрлэх мэдрэмж алдагдах шинж тэмдэг илүү бага илэрдэг бөгөөд эсрэгээрээ толгой өвдөх, халуурах, хоолой хөндүүрлэх, нус гоожих зэрэг шинж тэмдгүүд түгээмэл тохиолдож байгаа аж.

Дашрамд дурдахад Эзэн хааны коллежийн “COVID-19”-ийн Шинж тэмдгийг судлах хүрээлэнгийн эрдэмтэд вакцинд хамрагдаагүй ба вакцины нэг болон бүрэн тунд хамрагдсан хүмүүст “COVID-19”-ийн шинж тэмдэг хэрхэн өөр өөрөөр илэрч байгааг илүү түлхүү ажиглагдсан шинж тэмдгүүдээр эрэмбэлсэн байна. Үүнд:

 “COVID-19”-ийн эсрэг вакцины бүрэн тунд хамрагдсан хүмүүст /Илүү түгээмэл тохиолддог шинж тэмдгийг эхэнд эрэмбэлэв/

1. Толгой өвдөх

2. Нус гоожих

3. Найтаах

4. Хоолой хөндүүрлэх

5. Үнэрлэх мэдрэмж алдагдах

“COVID-19”-ийн эсрэг вакцины нэг тунд хамрагдсан хүмүүст /Илүү түгээмэл тохиолдддог шинж тэмдгийг эхэнд эрэмбэлэв/

1. Толгой өвдөх

2. Нус гоожих

3. Хоолой хөндүүрлэх

4. Найтаах

5. Тогтмол ханиалгах

Вакцинд огт хамрагдаагүй хүмүүст /Илүү түгээмэл тохиолддог шинж тэмдгийг эхэнд эрэмбэлэв/

1. Толгой өвдөх

2. Хоолой хөндүүрлэх

3. Нус гоожих

4. Халуурах

5. Тогтмол ханиалгах шинж тэмдгүүд тохиолдож байгаа аж.

Дельта хувилбар вакцины үр нөлөөг бууруулдаг уу

Өнөөдрийн байдлаар ДЭМБ-аас зөвшөөрөгдсөн “COVID-19”-ийн эсрэг бүх вакцин судалгаагаар дельта вариантын эсрэг өндөр үр дүн үзүүлээд байна. Тухайлбал, Монгол Улсад ашиглагдаж буй дөрвөн вакцины хувьд:

Pfizer/BioNTech

Их Британийн Нийгмийн эрүүл мэндийн төвийн хийсэн судалгаагаар “Pfizer/BioNTech” вакцины бүрэн тунгийн тарилгаас хойш хоёр долоо хоногийн хугацаанд дельта хувилбараар хүндээр өвчлөхөөс 88 хувь, альфа хувилбарын өвчлөлийн эсрэг 93 хувь хамгаалдаг гэх үр дүнд хүрсэн байна.

AstraZeneca

Мөн Их Британийн Нийгмийн эрүүл мэндийн төвийн судалгаагаар “AstraZeneca” вакцин нь дельта хувилбараар хүндээр өвчлөхөөс 60 хувь, альфа вариантаар өвчлөхөөс 66 хувь хамгаалдаг гэх дүгнэлтийг хийсэн. Түүнчлэн Энэтхэг улсад хийгдсэн судалгаагаар тус улсын “Serum” институцэд “Covishield” нэрээр үйлдвэрлэгдсэн “AstraZeneca” вакцин нь дельта хувилбарын эсрэг дээрхтэй ижил үр дүнд хүрсэн гэж мэдээлсэн байна.

Sinopharm

БНХАУ-ын тархвар судлаач Жонг Наншаны мэдээлснээр “Sinopharm” болон “Sinovac” вакцинууд нь дельта хувилбарын халдвараар хүндээр өвчлөхөөс тодорхой түвшинд хамгаалдаг болохыг судалгаагаар тогтоосон гэж мэдээлсэн. Гэвч Хятадын эрдэмтэд одоог хүртэл дотоодын вакцинууд нь “SARS-CoV-2” вирусийн вариантуудын эсрэг ямар үр дүнтэй талаарх тодорхой мэдээллүүдийг өгөөгүй байгаа юм.

Гэвч БНХАУ-ын Өвчний хяналт, урьдчилан сэргийлэх төвийн дэд захирал асан Фэн Зижян өнгөрөгч сард Хятад вакцинууд бусад вариантуудтай харьцуулахад дельта хувилбарын эсрэг үр нөлөө багатай байгаа гэж мэдэгдсэн. Гэхдээ тэрээр Хятад вакцинууд дельта хувилбараар хүндээр өвчлөхөөс сэргийлж байгаа гэдгийг онцолж байв.

Харин Хонгконгийн их сургуулийн тархвар судлаач, профессор Бенжамин Каулинг судалгааны урьдчилсан үр дүнгээр “Sinopharm” болон “SinoVac” вакцины үр нөлөө “COVID-19”-ийн анхны хувилбартай харьцуулахад дельта хувилбарын эсрэг 20 хувиар буурсан гэж мэдээлсэн байна.

Sputnik-V

ОХУ-ын Гамалейн нэрэмжит тархвар судлал, микробиологийн хүрээлэнгийн дэд захирал Денис Логунов өнгөрөгч сард тус улсын дархлаажуулалт болон эрүүл мэндийн цахим бүртгэлийн тоо баримтыг үндэслэн “Sputnik-V” вакцин нь дельта хувилбарын эсрэг 90 хувийн үр дүнтэй гэж мэдээлсэн.

Эх сурвалж: itoim.mn, WHO.int, COVID Symptom Study, WebMD, Nature, Reuters, BBC, NPR, Healthline